उनी बसेको डिलैमा सयपत्री फुलेको छ। तर मनिसालाई यतिबेला न सयपत्री जोगाउने चासो छ न माया नै। उनी आफ्नो ज्यान कसरी जोगाउने भन्ने पिरोलोमा छन्। उनको ५ जनाको परिवार घरविहीन भएको छ। ‘श्रीमान कालापार(भारत)जानु भएको छ। चार छोरा छोरीको लालनपालन गर्दै आएकी उनको भूकम्पले घर भत्कियो। भएको लत्ताकपडा र खाद्यान्न सबै पुरियो। कमाई छैन। छोराछोरी साना छन्। के खाएर बाँच्ने हो’ उनले भनिन ‘जेठी छोरी हिजो देखि बिरामी छ। चिसोले १७ वर्षकी छोरीलाई ज्वरो आउन थालेको छ। यस्तो अवस्थामा कसरी तिहार मनाउनु। भूकम्पले हामी सबैको सातो लगेको छ। फेरि पनि हल्लाइरहेको छ। छोराछोरी त्रासमा छन्। यस्तो अवस्थामा आएको तिहारले हामीलाई गिज्याइरहेको जस्तो लागिरहेको छ।’

भूकम्पमा घर भत्किएपछि नलगाड नगरपालिका-१ पालीकी १६ वर्षीय भूमिका पुन घरमै पुरिइन्। गाउँलेले उद्धार गरेर बचाए। सँगै सुतेकी बहिनी विनिताको मृत्यु भयो। अहिले पनि भूमिकालाई त्यही घटनाले पछ्याइरहेको छ। बहिनी गुमाउँदाको पीडा एकातिर छ भने आफैं पनि घटनामा परेकोले उनी बेलाबेला त्यही घटना सम्झेर झस्किने र बर्बराउने गर्छिन्। उनको घरमा ढपक्क सयपत्र फुलेका छन् तर बहिनीको शोकमा उनीहरूको तिहार यसपालि हुने छैन। उनको गाउँमा तिहारको कुनै रौनक छैन। बहिनी सहित यसपाली उनीहरू देउसी खेल्ने तयारी गरिरहेका थिए। तर देउसी खेल्ने सपना पुरा नहुँदै भूकम्पले बहिनीलाई निल्यो।

उनका साथीभाइ पनि पीडामा छन्। यी त केही प्रतिनिधि पात्र मात्र हुन्। जाजरकोट र रुकुम पश्चिममा गरी करिब ६० हजार बढीले घर छोडेर त्रिपालमा बसेका छन्। केहीले त्रिपालमै टीकाटालो गर्ने योजना बनाएका छन्। सदरमुकाम खलंगास्थित कस्तुरी बोडिङ्गको चौरमा त्रिपालमा बसिरहेकी कल्पना खत्रीले भाइलाई बोलाएर त्रिपालमै टीकाटालो गर्ने योजना बनाएकी छन्। जताततै शोक छ।

तर पनि आफ्नो परम्परा त्रिपालमै भएपनि निरन्तरता दिने योजनामा कल्पना छन्। बाहिर तिहारको रौनक नभएपनि त्रिपाल भित्रै भएपनि सामान्य टीकाटालो गर्ने योजनामा धेरै भूकम्पपीडित रहेको नलगाड नगरपालिका-४ का वडाध्यक्ष बद्री पन्तले बताए। कतिपयले भने भूकम्पको पीडामा यसपाली टीकाटालो नगर्ने बताएका छन्।