सुन्धारास्थित केन्द्रीय कारागारबाट करिब ३३ सय कैदीबन्दी फरार भएको पाइएको छ ।
कारागारमा रहेका ३८ सय कैदीबन्दी मध्ये हाल करिब ५ सयको हाराहारीमा मात्रै छन् ।
त्यस्तै भद्रबन्दी गृह र महिला बन्दी गृहमा सय/सय जनाको संख्यामा कैदीबन्दी रहेको कारागार स्रोत बताउँछ।
कारागार व्यवस्थापन विभागका एक अधिकृतका अनुसार, भद्र बन्दीगृहमै रहेका टोपबहादुर रायमाझी पनि भागेका छन् ।
उनी नक्कली भुटानी शरणार्थी प्रकरणमा पुर्पक्षका लागि कारागारमा थिए ।
विभागका अनुसार, भागेका कैदीबन्दीलाई सेनाले पक्राउ गर्न थालेपछि केही भने फिर्ता भएका छन् ।
विभागका ति अधिकृतका अनुसार, नख्खु कारागारबाट निस्केका कैदीबन्दीहरूले राति १० बजेतिर आएर ‘हामी आयौं, तिमीहरू पनि भाग’ भन्दै केन्द्रीय कारागार तोडफोड गरेका थिए ।
कारागारको बाहिरी सुरक्षामा रहेका प्रहरीले भने कैदीबन्दीको आक्रमणपछि भागेर सैनिक मुख्यालय भित्र छिरेर ज्यान जोगाएका थिए ।
त्यसपछि मात्रै सेना पुगेर स्थिति नियन्त्रणमा लिएको थियो । तर, सेना पुग्दा कैदीबन्दी त्यहाँबाट भागिसकेका थिए ।
डोल्पा न्यूज । २५ भाद्र २०८२, बुधबार १५:४५