विष्णुप्रसाद देवकोटा
डोल्पाको त्रिपुराकोटमा संयुक्त सुरक्षा चेकजाँचका क्रममा ५५ लाख ९० हजार रुपैयाँ नगदसहित पक्राउ परेका दुई जनामाथि थप अनुसन्धान गर्न जिल्ला अदालत डोल्पाले पाँच दिनको म्याद दिएको छ।
बुधबार त्रिपुरासुन्दरी नगरपालिका–१ स्थित त्रिपुराकोट बगर बजार क्षेत्रमा जिल्ला प्रहरी कार्यालय डोल्पा, सशस्त्र प्रहरी बल नेपाल र जिल्ला प्रशासन कार्यालयको समन्वयमा गरिएको आकस्मिक सुरक्षा चेकजाँचका क्रममा त्रिपुरासुन्दरी नगरपालिका–७ का दुई जनाको साथबाट चेकजाँचकाे क्रममा ठुलाे मात्रामा नगद नियन्त्रणमा लिएकाे थियो।
जिल्ला प्रहरी कार्यालय डोल्पाका प्रहरी नायब उपरीक्षक (डीएसपी) अनिलराज गिरीका अनुसार पक्राउ परेका दुवै जनामाथि थप अनुसन्धानका लागि जिल्ला अदालत डोल्पाबाट पाँच दिनको म्याद प्राप्त भएको छ।
उनका अनुसार नियन्त्रणमा लिइएको  रकमको स्रोत, वैधानिकता, प्रयोगको उद्देश्य तथा घटनासँग सम्बन्धित अन्य पक्षबारे अनुसन्धान पछि  सार्वजनिक गरिने छ।
डीएसपी गिरीले भने, “जिल्ला अदालतबाट पाँच दिनको म्याद प्राप्त भएको छ। नियन्त्रणमा लिइएको रकमको स्रोत र कानुनी हैसियतबारे विस्तृत अनुसन्धान जारी छ। अनुसन्धान सम्पन्न भएपछि थप विवरण सार्वजनिक गरिनेछ।”
यता, घटनापछि सामाजिक सञ्जालमा  सर्वसाधारणले पक्राउ परेका व्यक्तिहरू विगतदेखि यार्सागुम्बालगायत जडीबुटी व्यापारमा संलग्न व्यापारी भएको दाबी गर्दै यार्सा कारोबारको मौसममा लाखौं रुपैयाँ नगद कारोबार सामान्य हुने बताएका छन्।

साथै आर्थिक वर्षको अन्त्यतिर विभिन्न विकास योजनाको भुक्तानी रकमसमेत नगद रूपमा ओसारपसार हुने भएकाले पर्याप्त आधारबिना नागरिकलाई नियन्त्रणमा लिएर दुःख दिएको भन्दै असन्तुष्टि व्यक्त गरेका छन्।
नियन्त्रणमा लिएको रकमको वास्तविक स्रोत, वैधानिकता र प्रयोगको उद्देश्यबारे अनुसन्धान जारी रहेकाले घटनाको निष्कर्ष अनुसन्धान प्रतिवेदनपछि मात्रै स्पष्ट हुने प्रहरीले जनाएको छ।बुधवा प्रहरीले  त्रिपुराकाेट बजार क्षेत्रवाट त्रिपुरासुन्दरी -७ का विष्णुलाल केसी र भक्तीचन्द्र राेकायालाई नियन्त्रणमा लिएको थियाे ।