फोक्सुण्डो ताल क्षेत्रमा पर्यटकको अनुभव सुधार्ने उद्देश्यसहित कृषि विकास बैंक डोल्पा शाखाले पूर्वाधार सहयोग उपलब्ध गराएको छ।

“संस्थागत सामाजिक उत्तरदायित्व (CSR)” कार्यक्रम अन्तर्गत गरिएको यस पहलले ताल वरपरको व्यवस्थापन र सौन्दर्यमा सिधा प्रभाव पार्ने अपेक्षा गरिएको छ।
शाखाले फोक्सुण्डो ताल संरक्षण समितिलाई ९ वटा फलामका आरामदायी बेन्च र ४ वटा डस्टबिन हस्तान्तरण गरेको हो। करिब २ लाख रुपैयाँ बराबरको उक्त सामग्रीले पर्यटकलाई बस्न सहजता दिने र फोहोर व्यवस्थापनमा सुधार ल्याउने विश्वास गरिएको शाखा प्रमुख प्रदीप पाण्डेले जानकारी दिए।

उनका अनुसार सानो देखिने यस्ता पूर्वाधारले पर्यटनको गुणस्तर उकास्न महत्वपूर्ण भूमिका खेल्नेछ।
पछिल्लो समय बैंकले सेवा प्रवाहमा सुधार, ग्राहक विस्तार र डिजिटल कारोबार प्रवर्द्धनमा पनि ध्यान दिएको जनाएको छ। सदरमुकाम दुनैमा हालै सञ्चालन गरिएको ग्राहक सचेतना कार्यक्रमले बैंकप्रतिको विश्वास अझ मजबुत बनाउने लक्ष्य राखिएको छ।
शनिबार ताल परिसरमै आयोजित कार्यक्रममा बैंकका केन्द्रीय असुली विभाग प्रमुख सुन्दुर खतिवडा, राजु केसी, प्रदेश प्रमुख अनोज बस्नेत लगायतको उपस्थिति रहेको थियो। कार्यक्रममा वडा नम्बर ८ का अध्यक्ष निमा लामाले यस्ता सहयोगले पर्यटन प्रवर्द्धनमा सकारात्मक ऊर्जा थप्ने बताए।

यसैबीच, फोक्सुण्डो भ्रमणमा पुगेका पर्यटकहरूले पदयात्रा मार्गमा सूचना अभाव र केही जोखिमपूर्ण खण्डप्रति ध्यानाकर्षण गराएका छन्।

उनीहरूले मार्गमा आराम कक्ष र सूचनामूलक संकेतहरू थप गर्न सुझाव दिएका छन्। सरोकारवाला निकायले यी सुझावलाई प्राथमिकतामा राखेमा समग्र पर्यटन अनुभव अझ सुदृढ हुने अपेक्षा गरिएको छ।