डोल्पा:डोल्पाको ठुलीभेरी नगरपालिका–१ मा पर्ने थालामा निर्माण गरिएको नेपाल टेलिकमको इन्टरनेटसहितको टेलिफोन टावर अलपत्र परेको छ। दुई वर्षअघि नै निर्माण गरिएको टावर अझैसम्म सञ्चालनमा आएको छैन। निर्माण कम्पनीले काम पूरा नगर्दा टावर सञ्चालनमा आउन नसकेको हो ।
फोरजी इन्टरनेट सेवासहितको उक्त टेलिफोन टावर सञ्चालनमा नआउँदा नागरिकहरु फोन तथा इन्टरनेट सुविधाबाट बञ्चित भएको वडाध्यक्ष तेजेन्द्र बहादुर रोकायले बताए। टावर बनेको करिब दुई वर्ष जति भइसक्यो । तर सञ्चालनमा आउन सकेको छैन, यसमा नेपाल टेलिकम र निर्माण व्यवसायी दुबैको गल्ती देख्छु, मैले पनि धेरै पटक दुनैमा रहेको दुरसञ्चार कार्यालयमा टावर सञ्चालनका लागि अनुरोध गरेँ उनी भन्छन्, तर सञ्चालनमा भएन। टावर नभएपछि अहिले थालागाउँ, खाल्दारा लगायतका वडाभित्रका बस्तीहरूमा फोनले काम गर्दैन । फोन गर्नका लागि गाउँ छाडेर पर डाँडासम्म जानुपर्ने अवस्था छ ।
प्रमुख जिल्ला अधिकारी रोमबहादुर महतले लामो समयदेखि टावर ठडिएपनि सेवा भने सुचारु हुन नसकेको बताए । टावर सञ्चालन नहुँदा जनतालाई समस्या परेको छ, उनले भने, टावर सञ्चालनमा नआउँदा अहिले सामाजिक सुरक्षा भत्ता, बैंङ्क खाताका लागि नभइ नहुने राष्ट्रिय परिचयपत्र बनाउन घुम्ती टोली लिएर थाला लगायत विभिन्न गाउँहरूमा जिल्ला प्रशासनको टोली पठाउन सकिएको छैन।
टावर सञ्चालन भएमा वडाका अनुसार थालामा करिब चारसय परिवारले सञ्चार सुविधा पाउनेछन् । हाम्रो काम टावरको भौतिक निर्माण लगायतका काम गर्ने हो, त्यो पूरा गरिसकेर टावर ठडिएको दुई वर्षै भयो, केही दुई चारवटा सामान जोड्न बाँकी हो, यसले टावर सञ्चालनमा कुनै असर गर्दैन, टेलिकमले नै थप उपकरण जडान गरेर दुई वर्ष अघिनै टावर सञ्चालनमा ल्याउन सक्थ्यो, स्पार्क जलजला देवी निर्माण कम्पनीका प्रोपाइटर कुमार पौडेलले भने । टावर निर्माणका लागि २०७९ तिरै सम्झौता भएको थियो । काम दुई वर्षअघिनै नब्बे प्रतिशत सकिएको हो, दश प्रतिशत काम पनि टावर राख्ने ठाउँ विकट भएकाले सामान लैजान कठिनाइ भएकाले पूरा हुन नसकेको निर्माण कम्पनीको दाबी छ।
नेपाल टेलिकम बबरमहल कार्यालयका उपप्रवन्धक प्रेम क्षेत्रीले भने निर्माण ब्यवसायीकै कारणले टावर सञ्चालनमा आउन नसकेको बताए । टावर त बनाइएको छ तर काम पूरा हुन सकेको छैन, निर्माण ब्यवसायीले एक–दुई महिना समय दिनुस्। काम गर्छौ भनेका छन्, त्यसपछि मात्र टावर सुचारु होला । नेपाल टेलिकमले आफूले थप गर्नुपर्ने उपकरण ल्याउन नसकेकै कारण दुई वर्षअघि निर्माण गरिएको टावर सञ्चालन हुन नसकेको जिल्लास्थित सरोकारवालाको आरोप छ।
(ईकान्तिपुर देखि)
