डोल्पा, भदौ २ गते ।त्रिपुरासुन्दरी नगरपालिका–१ काटियाचौरस्थित त्रिपुरा माध्यमिक विद्यालयमा एसईई परीक्षा सञ्चालन भएको पाँचौं दिनमा अवलोकन गर्ने अवसर पाइयो । विद्यालयको शान्त परिवेश, विद्यार्थीहरूको अनुशासित एकाग्रता, वरिपरिको हरियाली र स्वच्छ वातावरणले परीक्षा मात्र नभई शिक्षा–मन्दिरको गहिरो महत्त्व स्मरण गराइरहेको अनुभूति भयो । पत्रकारको नाताले यस्तो ऐतिहासिक क्षण नजिकबाट हेर्ने अवसर पाउनु आफैंमा स्मरणीय रह्यो ।

यस विद्यालयको इतिहास २०१७ सालदेखि सुरु हुन्छ । २०७१ सालमा माध्यमिक विद्यालयको रुपमा प्रस्तावित भए पनि लामो समयसम्म परीक्षा केन्द्र बन्न पाएको थिएन । जिल्लाका अन्य विद्यालयहरू छोटो समयमा नै उच्च मावि हुँदै क्याम्पससम्म रूपान्तरण भइसकेका बेला, काटियाचौरको यो विद्यालय भने २०८२ साल साउन २९ गतेदेखि पहिलोपटक एसईई परीक्षा सञ्चालन गर्ने अवसर पाएको हो ।

२२ सय मिटरको उचाइमा, हरियाली फाँटका टाकुरामा, शान्त र उपयुक्त वातावरणमा अवस्थित यो विद्यालय सबै हिसाबले परीक्षा केन्द्रका लागि उपयुक्त बनेको छ । यातायात सुविधा सहज हुनुका साथै टाढाटाढाबाट परीक्षा दिन आउने विद्यार्थीलाई बसोबास र खानपिनको व्यवस्थासमेत गरिएको छ ।

विद्यालयका प्रध्यानाध्यापक तुलबहादुर विष्टले भने,“यो हाम्रो विद्यालय मात्र नभई सम्पूर्ण गाउँकै गौरव हो । पहिले पहिले परीक्षा दिनकै लागि टाढासम्म धाउनुपर्थ्यो, आज आफ्नै आँगनमा एसईई केन्द्र पाएको छौँ । यसले विद्यार्थीको आत्मबल बढाएको छ, अभिभावकलाई सहज बनाएको छ, अनि विद्यालयको प्रतिष्ठा पनि उच्च बनाएको छ ।”

स्थानीय अभिभावक तथा पुर्व विव्यस अध्यक्ष  टंकप्रसाद उपाध्यायले यसलाई ऐतिहासिक दिनका रूपमा लिँदै भने, “हाम्रो छोराछोरी अब टाढासम्म जानु पर्दैन, आफ्नै गाउँमै परीक्षा दिन पाउँदा हामीलाई गर्व लागेको छ । यो अवसरले शिक्षा तर्फ सबैलाई थप प्रोत्साहन गर्नेछ ।”

यस्तै, विद्यालय व्यवस्थापन समितिका अध्यक्ष देविकृष्ण उपाध्यायले भने,“विद्यालय सबै हिसाबले केन्द्रमा छ । यहाँको भौगोलिक अवस्थाले अनुकूल वातावरण दिएको छ, विद्यार्थीलाई बसोबास र खानपिनको सुविधा मिल्ने व्यवस्थासमेत गरिएको छ । अब यसलाई अवसरका रूपमा प्रयोग गर्दै विद्यालयको गुणस्तर अझै माथि उठाउनुपर्ने छ ।”

शिक्षा क्षेत्रका जानकारहरूका अनुसार, परीक्षा केन्द्र प्राप्त गर्नु केवल परीक्षा सञ्चालनको कुरा मात्र होइन, विद्यालयको क्षमता, विश्वास र भविष्यप्रतिको आस्थासँग गाँसिएको विषय हो ।

विद्यालय भनेको केवल पठनपाठन गर्ने कोठा मात्र होइन, उज्यालो भविष्य निर्माण गर्ने कारखाना हो ।

यसरी, काटियाचौरको त्रिपुरा माध्यमिक विद्यालयले यसपटक पाएको एसईई केन्द्र केवल परीक्षा सञ्चालनको अवसर मात्र नभई शिक्षा–यात्राको नयाँ अध्याय बनेको छ ।