विष्णुप्रसाद देवकोटा
डाेल्पा,मङ्सिर २६ गते ।
मानवअधिकार रक्षकहरुकाे लागि ५ दिने क्षमता विकास तालिम सदरमुकाम दुनैमा सम्पन्न भएकाे छ ।
महिला सशक्तीकरण केन्द्र डोल्पाको आयोजना तथा संयुक्त राष्ट्रसङ्घको आर्थिक सहयोगमा ठूलीभेरी नगरपालिकाको सम्पन्न भएकाे हाे ।
ठूलीभेरी नगरपालिकाका ८ वटा वडाबाट प्रतिनिधित्व हुने गरि महिला ११ र पुरुष १२ गरि २३ जनाको सहभागिता रहेकाे मानवअधिकार रक्षक तालिम मङ्सिर २१ देखि २५ गतेसम्म जिल्ला समन्वय समितिको सभाहलमा सञ्चालन भएकाे थियाे ।
सहजीकरण महिला सशक्तीकरण केन्द्र डोल्पाको कार्यकारी निर्देशक रणबहादुर कार्की, जिल्ला अदालत डोल्पाका श्रेस्तादार हरिगोपाल ज्ञवाली, जिल्ला प्रहरी कार्यालयका सहायन निरीक्षक सुवास राणा र बैतनिक वकिल तथा अधिक्तवक्ता पूर्णप्रसाद हमालले तालिममा सहभागीहरुलाई सहजिकरण गर्नु भएकाे थियाे ।
मानवअधिकारको अर्थ, परिभाषा, पृष्ठभूमि, मानवअधिकारको महत्व, वर्गीकरण, संयुक्त राष्ट्रसङ्घको वडापत्र १९४८, नेपालको संविधान, यसका विशेषता, मौलिक हक र राज्यका निर्देशक सिद्धान्त, मौलिक हक र मानवअधिकार बिच समानता र भिन्नतालगायतका विषयमा सहभागीलाई प्रशिक्षण दिइएकाे थियाे ।
यसैगरी मावअधिकार र अधिकार बिच समानता र असमानता, मानवअधिकार उल्लङ्घन र अपराध बिच फरक, मानवअधिकार रक्षक के, किन र कसरी र राज्यको परिभाषा, विशेषता, मानवअधिकार रक्षकका विशेषता, प्रकार मानवअधिकारका कर्तव्य र जिम्मेवारी, मानवअधिकार रक्षकले गर्न हुने र नहुने कामहरु, मानवअधिकार रक्षक सम्बन्धी निर्देशिका २०६९ र यसको विशेषता, विद्युतीय अपराध र लागु औषध दुर्व्यसनी बारे परिभाषा, वेफाइदा र रोकथाम सम्बन्धी कानुनी र संरचनात्मक व्यवस्थाका हिंसा र हिंसाका प्रकार र यसको रोकथाम सम्बन्धी कानुनी नीतिगत र संस्थागत प्रवन्धको बारेमा विभिन्न सत्रमा समुहगत छलफल प्रश्नोत्तर र प्रस्तुतीकरण कार्य गरिएको थियो ।
५ दिने तालिमकाे समापन महिला सशक्तीकरण केन्द्र डोल्पाको कार्यकारी निर्देशक तथा तालिम सहजकर्ता रणबहादुर कार्कीको अध्यक्षता तथा जिल्ला समन्वय समिति डोल्पाका प्रमुख श्यामबहादुर रोकायाको प्रमुख आतिथ्यतामा सम्पन्न गरिएको थियो ।
समापन सत्रमा बाेल्दै प्रमुख अथिति समन्वय प्रमुख राेकायाले सहभागीहरुलाई तालिमबाट सिकेका विषयवस्तुहरुलाई व्यवहारमा प्रयोग गर्न र तालिम पश्चात सहभागीहरुको आनीवानी व्यवहार शैली र सोचमा परिवर्तन गर्न अनुरोध गर्नुका साथै सिकेका कुरालाई अरुलाई सिकाउन सुझाब दिनुभयो ।
सहभागीहरुकाे तर्फबाट पवि शाही र सरोजविक्रम शाहीले ५ दिने तालिममा धेरै विषयहरु सिकेको र मानवअधिकारका विविध क्षेत्रमा जानकारी हासिल गर्ने अवसर प्राप्त भएकाे बताउनु भयाे ।
महिला सशक्तीकरण केन्द्रका कार्यकारी निर्देशक तथा सहजकर्ता रणबहादुर कार्कीले सहभागीहरुलाई आफूले सिकेका सिप क्षमता र ज्ञान अन्यलाई सिकाउन र मानवअधिकारको विषयमा अधिकार र कर्तव्यलाई सँगसँगै अनुसरण गर्न आग्रह गर्नु भएकाे थियाे ।
